Komisioni për përzgjedhje të kandidatëve për anëtarë të bordit drejtues të FKPK-së, i përbërë nga guvernatori i përkohshëm i BQK-së, Bashkim Nurboja (kryesues), ministri i Financave, Punës dhe Transfereve, Hekuran Murati dhe auditorja e përgjithshme, Vlora Spanca, ka mbajtur një takim për të diskutuar procedimin e mëtejmë për të siguruar plotësimin sa më të shpejtë të pozitave vakante të anëtarëve të bordit drejtues të FKPK-së.

Në takim ka marrë pjesë edhe përfaqësuesi i projektit të asistencës teknike të Ambasadës së Britanisë së Madhe për rekrutimet në pozitat e larta publike në Kosovë.

Duke vlerësuar se në konkursin e fundit të shpallur për këto pozita, kishte mangësi në kërkimin e informacioneve të nevojshme për të siguruar një vlerësim dhe verifikim objektiv të kandidatëve brenda një periudhe të arsyeshme kohore, komisioni unanimisht ka vendosur që ky konkurs të rishpallet me plotësimet e nevojshme.

Konkursi i plotësuar do të shpallet javën e ardhshme dhe procesi i përzgjedhjes do të jetë i asistuar në kuadër të projektit në fjalë të Ambasadës së Britanisë së Madhe.