![](https://www.epokaere.com/wp-content/uploads/2022/03/murati.png)
‘Je ministri më i dështuar’, Hekuran Murati replikon me deputetët në Kuvend
Ministri i Financave, Hekuran Murati është përballur me kritika dhe akuza për mosrealizim të projekteve kapitale nga deputetët e opozitës në seancën e sotme të Kuvendit të Kosovës.
Ai është akuzuar edhe për diskriminim të komunave ku nuk udhëheq partia e tij.
Por, këto akuza i ka mohuar ministri Murati, i cili ka thënë se është duke e bërë të kundërtën, duke i trajtuar barabartë komunat dhe se pret që realizimi i projekteve nëpër komuna të përshpejtohet.
“Nuk ka bllokadë nga niveli qendror, përkundrazi ne kërkojmë nga ta që t’i kryejnë sa më shpejt që të jetë i mundur. Nëse bëhet fjalë për çështje të tjera, për lista dëshirash që mund t’i kenë kryetarët e komunave dhe kërkojnë që pushteti qendror t’ua financojë dhe nëse kjo praktikë ka ekzistuar në të kaluarën, ne kemi thënë që kjo praktikë me këtë qeveri nuk mund të ekzistojë. Pra, të gjitha komunat do të trajtohen sipas peshës që e kanë, barabartë”, ka thënë Murati.
Murati ka thënë se ka përfunduar praktika kur ka pasur mbështetje shtesë nga niveli qendror për komunat ku në udhëheqje kanë qenë kryetarë nga partia në pushtet.
“Te ne s’ndodh, trajtohen barabartë”, ka thënë ai.
Por, deputeti i AAK-së, Besnik Tahiri, në replikë i ka thënë Muratit se është ministri “më i dështuar”.
“Kjo tregon që po përgatiteni me godit pushtetin lokal aty ku ju nuk e keni fuqinë politike dhe do të mbajë përgjegjës. Flasim se vjen buxheti prapë. Po s’është mirë me iu thënë ‘listë dëshirash’ këtyre projekteve, të cilat janë dakorduar. Unë në shumë mënyrë të thjeshtë të thashë. S’ka përgjigje prej Qeverisë. Këtë ta thashë. Ti më thua listë dëshirash. Duhesh me dhënë argumente, ministër. Unë s’kam nevojë për ty, por kjo qeveri ka nevojë për votën tonë. Unë s’kam nevojë për ty, asnjë send – për shkak se je ministër totalisht i dështuar. Je ministri që po e fundos qeverinë Kurti ngadalë-ngadalë”, ka thënë Tahiri.
Deputeti i AAK-së ka thënë se pret diskutim përmbajtjesor nga ministri Murati për këtë çështje.
Po ashtu, edhe deputeti i LDK-së, Besian Mustafa, ka thënë se gjendja në këtë drejtim përbën alarm.
“Ju si ministër i Financave e kuptoni që gjendja me investime kapitale është alarmante. Gjashtëmujori i parë dhe vetëm 11 për qind realizim, nuk ka hapësirë për shpresë momentalisht”, ka thënë ai.
Mustafa ka thënë se kishte pritshmëri që nga ministri Murati të ofrojë zgjidhje meqë “qeveria ofron zgjidhje e qytetarët janë për ankesa”.