Ndonëse nuk kemi një shifër zyrtare është thënë se mes të ushtarëve ukrainas që luftojnë përballë Rusisë në këto 4 ditë, janë edhe disa shtetas shqiptarë.

Një i ri shqiptar, i cili nuk ka pranuar që të identifikohet, me arsyetimin se u cenohet siguria atij dhe shumë bashkëkombësve të vetë, sjell rrëfime dramatike nga fronti i luftës për “BalkanWeb”.

Shqiptari, i cili kontakton me një numër amerikan, pohon se është pjesë e ushtrisë ukrainase, ndërkohë që prej vitesh ai jeton në ShBA. Ai deklaron se bashkë me 9 shqiptarë të tjerë janë në front të luftës 13 km në veri të Kievit, ndërkohë që shpreh shqetësimet e tij nga terreni.

“Jemi 9 shqiptarë këtu. Më i madhi është 44 vjeç. Vijmë nga vende të ndryshme, jemi shqiptarë nga ShBA-ja, apo dhe Kanadaja, ushtarë dhe ish-ushtarë”, ka thënë ai.

Ai ka pohuar se armiku (ushtria ruse) po avancon drejt Kievit, ndërsa shton se këto forca janë të shumta në numër. “Ata po avancojnë dhe beteja është e vështirë. Por pavarësisht se janë të shumtë në numër, nuk kanë guxim. Shumë prej robërve që kemi kapur, pohojnë se nuk ishin nisur për luftë dhe se i kanë mashtruar. Ata nuk duan të luftojnë kundër Ukrainës”, ka thënë shqiptari.