Nënkryetari i Listës Serbe dhe kryetari i Komunës së Shtërpcës, Dalibor Jevtiq, ka thënë se Lista Serbe do të marrë pjesë në zgjedhjet parlamentare të 9 shkurtit për të mos lejuar dikë “që do të punojë kundër interesave të serbëve” të jenë në vendet e garantuara për përfaqësuesit e komunitetit serb në Kuvend, si dhe në Qeverinë e Kosovës.

Jevtiq ka thënë se Lista Serbe, e cila dje ka dorëzuar listën e kandidatëve për deputetë, “do të funksionojë në interes të komunitetit serb” dhe “nuk do të lejojë asgjë që mund të dëmtojë pozitën e serbëve në Kosovë”.

Ai beson në fitimin e të dhjetë mandateve të garantuara për komunitetin serb, gjë që, thotë ai, është e rëndësishme që në Kuvendin e Kosovës “të mos jenë ata serbë që do të punojnë dhe do të miratojnë disa norma dhe rregullore ligjore në dëm të komunitetit serb sipas diktatit të dikujt nga Prishtina”.