Shtetet e Bashkuara dhe aleatët e saj në NATO po hetojnë shpërthimin që vrau dy persona në Poloni, por informacionet e hershme sugjerojnë se ai mund të mos jetë shkaktuar nga një raketë e lëshuar nga Rusia, tha presidenti i ShBA-së Joe Biden.

Ai foli pasi udhëheqësit globalë të mbledhur për takimin e G20 në Bali të Indonezisë, mbajtën një takim urgjent të mërkurën pas një shpërthimi vdekjeprurës në Przewodow, një fshat në Poloninë lindore pranë kufirit me Ukrainën.

Autoritetet ukrainase dhe polake thanë se shpërthimet, të cilat vranë dy persona, u shkaktuan nga raketa të prodhimit rus.

I pyetur nëse ishte shumë herët për të thënë se ndonjë raketë u lëshua nga Rusia, Biden tha se trajektorja sugjeronte të kundërtën.

“Ka informacion paraprak që e kundërshton këtë,” u tha ai gazetarëve. “Unë nuk dua ta them këtë derisa ta hetojmë plotësisht, por nuk ka gjasa … që të jetë shkarkuar nga Rusia, por do të shohim.”

“Shtetet e Bashkuara dhe vendet e NATO-s do të hetojnë plotësisht përpara se të veprojnë”, shtoi ai.

Deklarata la të hapura një sërë pyetjesh, duke përfshirë nëse Biden do të thoshte se Rusia nuk kishte fare faj në shpërthim.

Shtëpia e Bardhë nuk e sqaroi menjëherë komentin. Biden, megjithatë, dënoi Rusinë për shtimin e sulmeve me raketa brenda Ukrainës, duke i quajtur sulmet e fundit dhe viktimat e tyre civile “krejtësisht të pandërgjegjshme“.