Këshilltari për Siguri Kombëtare në Shtëpinë e Bardhë, John Bolton, ka mbërritur në Kiev të Ukrainës.

Duke folur për medie në kryeqytetin ukrainas, Bolton ka thënë se ka udhëtuar aty për të dëgjuar përparësitë e qeverisë së re, duke shtuar se është në interes të Shteteve të Bashkuara për të parë një Ukrainë të suksesshme.

Kjo është vizita e parë në Ukrainë, nga një zyrtar i lartë amerikan, që nga zgjedhja e presidentit, Volodymyr Zelenskiy, në muajin prill.

“Ambasadori Bolton është këtu për të nënvizuar mbështetjen e ShBA-së për sovranitetin e Ukrainës, integritetin territorial dhe rrugën euro-atlantike”, ka thënë më herët, ambasada e ShBA-së në Kiev.

Një ditë më parë, Boltoni ka thënë se Uashingtoni mbështet “përpjekjet e reformave dhe vizionin e Zelenskiyt, për të krijuar një Ukrainë më të fortë dhe më të përparuar”, krahas luftimeve të vazhdueshme midis forcave qeveritare dhe separatistëve të mbështetur nga Rusia në lindjen e vendit.

Gjithashtu, Boltoni pritet të udhëtojë në Minsk të Bjellorusisë, për bisedime me presidentin, Alyaksandr Lukashenka, mirëpo nuk është bërë e ditur data e saktë e vizitës.

Udhëtimi i Boltonit në Minsk, i cili nuk është konfirmuar nga zyrtarët amerikanë, do të shënonte vizitën e nivelit më të lartë amerikan në Bjellorusi në 20 vitet e fundit.

Qeveria e një tjetër republike ish-sovjetike, asaj të Moldavisë, ka thënë më herët se Boltoni do të vizitojë Kishinjevin më 29 gusht.