Kryeministri britanik, Boris Johnson, ka thënë se Mbretëria e Bashkuar do të kthehet në një “normalitet domethënës” nga mesi i nëntorit.

Ky vend është aktualisht ndër më të prekurit në botë nga koronavirusi: me mbi 294 000 të infektuar dhe mbi 45 000 viktima.

Duke folur në një konferencë për media në Londër, Johnsoni ka shprehur besimin se familjet do të jenë në gjendje të mblidhen rreth pemës së Krishtlindjeve, në dhjetor.

“Kjo nuk është një periudhë e rëndësishme vetëm për familjet, por edhe për ekonominë e Mbretërisë së Bashkuar dhe miliona njerëz që punojnë në sektorë me të ardhura modeste”

“Ne shpresojmë për më të mirën, por planifikojmë për më të keqën”, ka thënë Johnsoni, duke shtuar se plani mbetet “i kushtëzuar”.

Johnsoni ka thënë se “sekreti i vërtetë” i luftimit të koronavirusit është “veprimi kolektiv i popullit britanik”, raporton “Rel”.

Sipas të dhënave të Universitetit Johns Hopkins, koronavirusi ka prekur mbi 13.8 milionë njerëz në gjithë botën.

Prej tyre, mbi 590 000 kanë vdekur dhe mbi 7.7 milionë janë shëruar.

Mbretëria e Bashkuar është e treta në botë për nga numri i viktimave, pas Shteteve të Bashkuara dhe Brazilit.

Vetë Johnsoni ka qenë i infektuar me koronavirus dhe pas disa ditësh mjekimi intensiv është shëruar.