Arsenali triumfoi në derbi ndaj Liverpoolit (3-1). Një nga protagonistët e “topçinjve” në këtë sfidë ishte mesfushori italian Jorginho.

32-vjeçari ishte titullar në skuadrën e trajnerit Mikel Arteta dhe me përvojën e tij ndihmoi Arsenal të fitojë. Për “Sky Sports”, ai ka thënë: “Ne besojmë në veten tonë dhe llogarisim te ndihma që i japim njëri-tjetrit në fushë”.

“Goli i Liverpoolit, që barazoi përkohësisht rezultatin, nuk ndryshoi asgjë në lidhje me atë që kishim përgatitur për këtë sfidë. Ne ditëm të rikthehemi sërish të fortë në pjesën e dytë, vazhduam të shtynim dhe kishim shumë energji”, ka deklaruar Jorginho. Duke folur për cilësitë e skuadrës së tij, mesfushori i Arsenalit ka shtuar: “Kemi një ekip të mirë dhe një grup modest. Ne e dëgjojmë njëri-tjetrin. Të gjithë mendojmë për njëri-tjetrin në këtë grup dhe dje demonstruam pjekurinë e ekipit tonë”.

“Mendoj se me këtë fitore, por edhe duke parë atë që kemi bërë në dy sezonet e fundit, ne mund të fitojmë titullin në Premier Ligë. Jemi shumë pranë me Liverpooli e Manchester City, ndaj mund t’ia dalim mbanë”, ka deklaruar Jorginho.