Qytetarët e Komunës së Junikut, të Premten me datë 18.01.2019, kanë mundur të dallojnë ndryshimin në furnizim me energji elektrike nga ana e KEDS-it. Kështu thuhet në njoftimin e KEDS-it.

“Linja e furnizimit Llukë- Junik ishte e stërngarkuar dhe e vjetërsuar, shkak i kësaj furnizimi me energji elektrike në territorin e Komunës së Junikut, ishte shumë e dobët. Ka kohë që kanë filluar punimet në renovimin e linjës Llukë- Junik, e cila tashmë është linjë e veçantë për Komunën e Junikut, e ndërtuar sipas standardeve bashkëkohore, e cila është finalizuar të Premten me 18.01.2019 në orët e vona të mbrëmjes ku edhe është lëshuar në funksion kjo linjë”, është thënë në njoftimin e KEDS-it.

Sipas këtij njoftimi, tashmë, rrjeti elektrik për Komunën e Junikut është krejtësisht i ri, me çka banorët e Junikut pas një periudhe të gjatë do të kenë furnizim të plotë dhe stabil me energji elektrike, ashtu siç e meritojnë si pagues të rregullt.