Shefja e politikës së jashtme të Bashkimit Evropian (BE), Kaja Kallas ka përsëritur se NATO-ja është një pjesë thelbësore e mbrojtjes evropiane

“Sigurisht, BE-ja dhe NATO-ja janë partnerë të natyrshëm pasi shumica e anëtarëve të BE-së janë gjithashtu në NATO”, tha Kallas para fillimit të ditës së dytë të takimit të ministrave të jashtëm të NATO-s në Bruksel.

Duke cituar komentet e sekretarit të Shtetit të SHBA-së, Marco Rubio se SHBA-ja mbetet e përkushtuar ndaj NATO-s, por anëtarët e saj evropianë duhet të shpenzojnë më shumë për mbrojtjen, Kallas tha se Letra e Bardhë e BE-së për mbrojtjen, e paraqitur muajin e kaluar, ka të bëjë me zhbllokimin e fondeve, duke bërë më shumë për mbrojtjen, aftësitë dhe bashkëpunimin.

“Kjo përfundimisht do ta bëjë NATO-n më të fortë. Pra, ky plan në fakt shkon paralelisht me objektivat e aftësisë së NATO-s. Ai ndihmon vendet e NATO-s, vendet evropiane të përmbushin objektivat e tyre të aftësisë që kemi në NATO. Nga ana tjetër, e bën të gjithë NATO-n më të fortë, që është qëllimi ynë”, shpjegoi Kallas.

Botuar nga Komisioni Evropian më 19 mars, Letra e Bardhë ofron zgjidhje për të adresuar boshllëqet kritike të aftësive dhe për të ndërtuar një bazë të fortë industriale të mbrojtjes.

Ai sugjeron mënyra që vendet anëtare të BE-së të investojnë më shumë në mbrojtje, të prokurojnë sisteme mbrojtëse dhe të rrisin gatishmërinë afatgjate të industrisë së mbrojtjes evropiane.