Kamala Harris pret Kim Kardashian në Shtëpinë e Bardhë, diskutojnë për reformën e drejtësisë penale
Zëvendëspresidentja e SHBA-së, Kamala Harris, ka pritur në takim Kim Kardashian në Shtëpinë e Bardhë të enjten për të diskutuar reformën e drejtësisë penale, pasi administrata Biden fali disa persona të dënuar për vepra jo të dhunshme të drogës.
Të mërkurën, presidenti Joe Biden amnistoi 16 persona, duke falur 11 prej tyre dhe duke ua lehtësuar dënimin pesë të tjerëve. Katër nga këta iu bashkuan ngjarjes së të enjtes.
Harris është fokusuar në bindjen e afro-amerikanëve dhe të rinjve që t’i japin Bidenit dhe asaj një mandat të dytë katërvjeçar në një kohë që shumë votues janë të pakënaqur me atë se si e trajtojnë ata ekonominë, inflacionin e vazhdueshëm dhe luftën në Gaza.
Shtetet e Bashkuara burgosin më shumë njerëz se çdo vend tjetër. Rreth një në pesë nga ata 1.9 milionë njerëz janë pas grilave për një vepër penale të lidhur me drogën. Afro-amerikanët dhe latinët janë të burgosur në mënyrë disproporcionale dhe reforma e ligjit për drogën ka mbështetjen më të gjerë mes votuesve të rinj. Këto komunitete dhe të rinj priren të favorizojnë demokratët.
“Të gjithë bëjnë gabime dhe për disa mund të ngrihen në nivelin e të qenit një kriminel” ,tha Harris në Shtëpinë e Bardhë. “Por a nuk është shenjë e një shoqërie civile që ne u lejojmë njerëzve një mënyrë për të fituar rrugën e kthimit dhe për t’u dhënë atyre mbështetjen dhe burimet që u nevojiten për ta bërë këtë?”
Harris, një ish-prokurore, planifikoi të shpallte finalizimin e një rregulli të Administratës së Biznesit të Vogël që do të heqë shumicën e kufizimeve për pranueshmërinë e kredisë bazuar në të dhënat kriminale të një personi, thanë zyrtarët e Shtëpisë së Bardhë.
Kardashian, e cila është gjithashtu një sipërmarrëse, fillimisht u bë një aktiviste e zëshme për reformën e drejtësisë penale gjatë administratës së ish-presidentit Donald Trump. Harris e vlerësoi punën e saj.
“Sa herë që kam shkuar dhe kam vizituar një burg, kam takuar disa nga individët më të zgjuar me idetë më të ndritura dhe të shohim ndryshimet që po ndodhin për ta bërë më të lehtë ri-integrimin e tyre, mendoj se është diçka që ndryshon jetën”, tha Kardashian, shkruan Reuters, transmeton Express.
