![](https://www.epokaere.com/wp-content/uploads/2024/04/kamberi.jpg)
Kamberi takohet me Von Cramonin, bisedojnë për problemet e shqiptarëve në Luginë
Deputeti shqiptar në Parlamentin e Serbisë, Shaip Kamberi është takuar me eurodeputeten liberale të Parlamentit Evropian, Viola von Cramon.
Kamberi ka njoftuar se me von Cramon ka diskutuar problemet e diskriminimit të shqiptarëve në Luginën e Preshevës.
“Sapo përfunduam një takim të rëndësishëm me Eurodeputeten liberale të Parlamentit Evropian, Viola von Cramon, për të diskutuar problemet e diskriminimit të shqiptarëve, veçanërisht në Luginën e Preshevës. Në këtë takim, u përballëm me çështjet që prekin të drejtat dhe barazinë e shqiptarëve në Luginën e Preshevës”, ka shkruar Kamberi në “Facebook”.
Ai ka thënë se pjesë e diskutimit ishte dhe për rëndësinë e trajtimit të barabartë dhe të lirive individuale dhe kolektive, duke u bazuar në normat e konventave ndërkombëtare dhe evropiane për të drejtat e njeriut.
“Qëndrim të qartë të solidaritetit dhe angazhimit tonë për të adresuar diskriminimin e pasivizimin dhe për të ndihmuar në garantimin e të drejtave të plota për komunitetin shqiptar në Luginën e Preshevës”.
“Për ne, bashkëpunimi me miqtë dhe partnerët tanë është jetësor për të arritur qëllimet tona dhe për të ndikuar në ndryshimet e nevojshme për të siguruar një shoqëri më të drejtë dhe më të barabartë për të gjithë”, ka shkruar Kamberi.