Ish-kryeprokurorja për krime të luftës në Tribunalin e Hagës, Karla Del Ponte, ka kërkuar që gjykata ndërkombëtare penale të lëshojë një urdhër arresti për presidentin rus, Vladimir Putin, raporton AFP.

“Putini është një kriminel Iufte,” tha Del Ponte, e cila hetoi krimet e Iuftës në Ruandë dhe ish-Jugosllavi, në një intervistë me Le Temps.

Del Ponte, e cila gjithashtu shërbeu për vite në komisionin e OKB-së për hetimin e abuzimeve të të drejtave në luftën e Sirisë, theksoi se lëshimi i një urdhër-arresti sinjalizon se “puna hetimore është kryer”.

“Është i vetmi instrument që ekziston që bën të mundur arrestimin e autorit të një krimi të Iuftës dhe sjelljen e tyre para Gjykatës Ndërkombëtare për Drejtësi,” tha ajo për Le Temps.

Del Ponte pranoi se një urdhër arresti nuk do të thoshte domosdoshmërisht se Putini do të mbahej në paraburgim.

“Nëse ai qëndron në Rusi, kjo nuk do të ndodhte kurrë. Por do të ishte e pamundur që ai të largohej nga vendi i tij dhe do të ishte një sinjal i fortë se ai ka shumë shtete kundër tij”, nënvizoi ajo.