Kryetari i Komunës së Tetovës dhe i Lëvizjes BESA, Bilall Kasami, ka marrë ftesë që të paraqitet personalisht në Gjykatën Themelore të Tetovës më 15 shtator, në cilësinë e të akuzuarit për shkelje të ligjit.

Ftesa për t’u paraqitur në gjykatë ka të bëjë me vizitën e kryeministrit të Kosovës, Albin Kurti në Tetovë më 11 gusht, përkatësisht për mosintonimin e himnit shtetëror, por vetëm atij kombëtar dhe për valëvitjen e flamurit të Shqipërisë dhe Kosovës, por jo edhe atij të Maqedonisë.

Kreu i Besës, Bilall Kasami ka vlerësuar se ftesa për në gjykatë është frikë nga opozita.

“Edhe një tentim për frikësim dhe heshtje, që më bën të kuptoj se sa frikë e kanë opozitën shqiptare. Me këto akte, po na e shtoni kurajën. Koha e frikësimit dhe shantazhimit të shqiptarëve ka vdekur, ashtu siç është duke vdekur regjimi juaj. I detyrohemi vetëm qytetarëve dhe këtij populli, sa për regjimet e këtilla, nuk jemi frikësuar as në kohën e komunizmit, as tani. Koha juaj ka përfunduar. Numëroni ditët!”, është thënë në reagimin e Kasamit. /Alsat.mk