Kryetarja e Komisionit për Integrime Evropiane, Rrezarta Krasniqi, ka bërë me dije se janë ftuar katër deputetë të Kuvendit të Kosovës në Procesin e Berlinit. Ajo ka treguar se dy deputetë janë nga radhët e pushtetit dhe dy nga radhët e opozitës.

“Kemi një ftesë në Procesin e Berlinit me katër deputetë që janë të ftuar. Dy të pozitës dhe dy të opozitës. Nuk ka qenë e specifikuar, por janë katër dhe kanë kërkuar që shumica me qenë pozitë. Unë e kam të specifikuar që shumica të jenë pozitë dhe andaj kam caktuar dy pozitë dhe dy opozitë”, ka thënë Krasniqi në mbledhjen e këtij komisioni, ku në rend dite ka qenë raporti i punës për sesionin vjeshtor 2024.

Por, mospajtime me këtë ftesë ka pasur deputetja e Aleancës për Ardhmërinë e Kosovës (AAK), Time Kadrijaj. Sipas saj kjo është praktikë e re dhe e instaluar nga kjo qeveri.

“Në këtë legjislaturë është bërë një gabim sepse përfaqësimi duhet të jetë politike. Praktikat parlamentare janë të kenë përfaqësim politik, pavarësisht a është parti opozitare apo në pozitë. Kjo është praktika më e re e instaluar nga kjo qeveri. Nëse shkojmë në një udhëtim zyrtar nëse ka qenë ftesa se duhen dy opozitë dhe dy pozitë atëherë pajtohem. Nëse nuk ka të specifikuar ftesën nuk bënë. Nuk shkon ashtu është përfaqësim politik”, ka thënë Kadriaj.

Ndërsa aktivitetet e këtij sesioni, deputetja e AAK-së ka propozuar që të plotësohen sipas nevojës. “Zakonisht plani i punës varet nga agjenda legjislative, ne si komision nuk e kemi pasur asnjë shqyrtim. Për aktivitetet munden me u plotësuar dhe koordinuar sipas nevojave. Nuk është plani i punës statik”, është shprehur Kadrijaj.