Për brazilianin Raphinha, Barcelona ka marrë një ofertë të re nga Arabia Saudite, por ende nuk janë përgjigjur, raporton “Sport”.

27-vjeçari largua nga Leeds United verën e vitit 2022 për 57 milionë euro dhe nënshkroi një kontratë 5-vjeçare me Barcelonë, deri në vitin 2027. Ai është në sezonin e tij të dytë në “Camp Nou” (78 ndeshje e 15 gola në takimet zyrtare) dhe paguhet rreth 5.5 milionë euro në sezon.

Anësori me tipare sulmuese nuk e ka fshehur dëshirën për të qëndruar, por janë katër skuadra arabe që kërkojnë shërbimet e tij: Al-Hilal (ekipi që vendosi rekordin me 28 fitore radhazi), AlNassr (luan Cristiano Ronaldo), Al-Ittihad (luan Benzema) dhe Al-Ahli. Gjithsesi, Barcelona nuk do të heqë kollaj dorë nga lojtari, ndaj katalanasit kërkojnë rreth 70 milionë euro nga largimi i parakohshëm i Raphinhas.