KB Istogu ka siguruar për herë të parë promovimin në elitën e basketbollit të Kosovës.

Skuadra nga Dukagjini do të jetë pjesë e Superligës nga sezoni i ardhshëm, shkruan Express.

Istogu sonte regjistroi fitoren e dytë ndaj Boras në serinë finale të “Play-Offit”, duke u shpallur kështu kampion në Ligën e Parë.

Përveç kësaj, skuadra e drejtuar nga Fikret Shatri siguroi edhe promovimin në Superligë.

Ndeshja e zhvilluar sonte në “Don Bosko” përfundoi me rezultatin 81:94.

Arian Azemi me 34 pikë, Labinot Kelmendi dhe Drilon Shala me nga 14 pikë secili, ishin basketbollistët më të dalluar në fitoren e Istogut.

Te Bora u dalluan Dion Haxhosaj me 24 pikë dhe Mërgim Jakupi me 21 sosh.

Bora ka edhe një mundësi për të siguruar Superligën, pasi do të luajë në “Play-Out” me Ponte Prizrenin.