Instituti Demokratik i Kosovës (KDI) ka vlerësuar se vizitat e shpeshta të emisarëve specialë nga Shtetet e Bashkuara dhe Bashkimi Evropian janë duke dëshmuar për një dinamikë të shtuar në dialogun në mes të Kosovës dhe Serbisë.

Në këtë kontekst, KDI-ja ka theksuar se përderisa procesi gjendet në një fazë mjaft delikate, qytetarët e Kosovës janë të painformuar mbi përmbajtjen e takimeve të ndërlidhura me dialogun dhe dakordimet eventuale lidhur me këtë proces.

Sipas KDI-së, diskutimet mbi përmbajtjen e propozimit franko-gjerman/evropian dhe zbatimin e  marrëveshjes së dialogut mbi asociacionin janë temat kryesore në debatet mediale, ndërkohë që mungon një debat i strukturuar politik e shoqëror dhe një mostransparencë e theksuar e qeverisë mbi qëndrimet e saj në raport me këto propozime.

“Duke qenë i mbyllur dhe i reduktuar, ky proces çdo ditë e më tepër po krijon hapësirë për dezinformim, pasiguri dhe ulje të besimit të publikut. Informacionet selektive dhe deklaratat e kufizuara të emisarëve ndërkombëtarë mbeten burimet e vetme të informacioneve, ndërkohë që Qeveria po shmang adresimet për publikun. Prandaj qeveria si mandatare për të udhëhequr dialogun me Serbinë duhet të jetë e hapur dhe ta informojë publikun lidhur me qëndrimet e saj dhe të priturat nga ky proces. Kjo duhet të përfshijë edhe raportimet me vetiniciativë të kryeministrit në Kuvendin e Kosovës, si institucioni më i lartë përfaqësues”.

“Meqë përmbyllja e dialogut Kosovë-Serbi është çështje e interesit nacional, pritjet tona janë që edhe subjektet politike opozitare të tregohen të përgjegjshme dhe serioze në përpjekjet e tyre për ta  mbajtur qeverinë llogaridhënëse dhe për të ofruar kapacitetet e tyre në formësimin e qëndrimeve sa më konsensuale të palës kosovare. Në këtë drejtim, opozita përmes praktikave dhe instrumenteve kushtetuese parlamentare, do të duhej të ftonte kryeministrin në raportim në një seancë të jashtëzakonshme të Kuvendit, në lidhje me zhvillimet në procesin e dialogut”, është thënë në reagimin e KDI-së.