Komiteti Ekzekutiv (KE) i Federatës së Futbollit të Kosovës (FFK) mbajti sot mbledhjen e radhës nën drejtimin e kryetarit Agim Ademi, ku diskutoi për shumë çështje në futbollin e Kosovës.

Pavarësisht se ishte paralajmëruar se do të shkarkohet sekretari i përgjithshëm, Eroll Salihu, një gjë e tillë nuk ndodhi. KE shqyrtoi Projekt Strategjinë Zhvillimore të FFK-së, ku do të përfshihen objektivat afatmesme dhe afatgjata të zhvillimit të futbollit të Kosovës në të gjitha fushat.

KE diskutoi edhe për përkrahje të klubeve që kanë kaluar në rang më të lartë të garave, duke konstatuar se jo të gjitha kanë kushtet e nevojshme, ndaj FFK-ja do t’u dalë në ndihmë që të jenë të përgatitura në përputhje me rangun e garave. KE analizoi edhe ndeshjet e Përfaqësueses A që pati gjatë kësaj periudhe dhe konstatoi se ishin ndeshje të mirëseardhura për konsolidimin e Përfaqësueses para ndeshjeve kualifikuese për Botërorin 2022. Gjithashtu, u diskutua edhe për përgatitjet që duhet të ndërmarrin të gjitha organet e FFK-së për edicionin e ri të garave 2021/2022, si dhe shqyrtoi ankesat dhe parashtresat drejtuar këtij organi.