Gjatë këtyre ditëve, KEDS-i është duke përfunduar një investim të jashtëzakonshëm në Fushë-Kosovë. Bëhet fjalë për pesë dalje të reja të tensionit të mesëm 20 kV (kilovolt), tri nga të cilat tashmë janë lëshuar në punë, ndërsa dy tjerat lëshohen deri në fund të javës.

“Ky është rrjet komplet i ri dhe përfshin komplet Fushë-Kosovën. Pra, përfitues direkt është secili qytetar. Të njëjtën kohë, për secilin konsumator do të ketë edhe linja alternative. Pra, nëse ndodhë ndonjë e papritur në linjën ekzistuese apo domosdoshmëri e ndonjë intervenimi, konsumatori furnizohet menjëherë nga linja tjetër, duke mos u ballafaquar me ndalesë të energjisë elektrike. Të gjitha këto dalje, që shtrihen në tërë territorin e qytetit janë nëntokësore”, ka njoftuar KEDS.

Fushë-Kosova është qyteti me rritjen më të madhe të popullatës në Kosovë.

“KEDS-i e mori përsipër vet komplet situatën, duke e tejkaluar problemin e mbingarkesave të mëdha, të cilat gjatë dimrit ishin shumë problematike. Tashmë, qytetarët e kësaj komunë nuk do ta kenë më këtë brengë, pasi është zgjidhur për një kohë të gjatë. Bashkë me rrjetin komplet të ri, janë duke u zëvendësuar edhe 50 trafo të reja, me kapacitete të dyfishuara gjithashtu dhe me stabilimente përcjellëse. Gjatë zëvendësimit po bëhen ndërprerje të planifikuara të energjisë elektrike, pasi nuk mund të punohet nën tension dhe ky proces merr mjaft kohë brenda një dite. Por, kjo bëhet që të përfitojnë direkt qytetarët”, ka njoftuar KEDS.

Projekti i Fushë-Kosovës është i ngjashëm me mega-projektin e Prishtinës, që paraqet gjithashtu zëvendësimin e rrjetit të vjetër me të ri, dyfishimin e kapaciteteve, hyrjen e kabllove nëntokë dhe krijimin e linjave alternative.

Pos këtyre qyteteve, KEDS-i ka vendosur rrjetin nëntokësor ose është në proces edhe në disa komuna tjera, si në Drenas, Vushtrri, Istog, Viti apo Podujevë.

(Q.R / Epoka e re)