Në kuadër të aksionit të qeverisë respektivisht MMPH, që në orën 8:00 të mëngjesit ekskavatorët e KEK-ut filluan largimin e deponive ilegale në pjesë të ndryshme të Kastriotit.

Banorët e Kastriotit u shprehën jashtëzakonisht të kënaqur me aksionin e KEK-ut për eliminimin e deponive ilegale.

“Është kënaqësi që më në fund kjo deponi po largohet. Prej pas lufte ka ndodhë që të gjithë kanë hedhë mbeturina, shtëpitë janë ndezë veç ne e dimë si kem kalu, veç tani jemi të kënaqur që kjo deponi po eliminohet”, u shpreh Nazmi Preniqi shtëpia e të cilit gjendet afër kësaj deponie ilegale.

Njëjtë është shprehur edhe Dardan Preniqi. “Jemi shumë të kënaqur, faleminderit se këtu ka qenë deponia shumë e madhe prej pas lufte kanë hedhë mbeturina krejt komuna e Kastriotit, shumë mirë janë duke bërë”, ka thënë Preniqi.

Ky aksion i KEK-ut po bëhet në kuadër të fushatës “Ta pastrojmë Kosovën”.

Skender Bucolli, drejtor për marrëdhënie me publikun dhe komunitete, ka thënë KEK-u çdo herë është pjesë e aksioneve për përmirësimin e ambientit. “Edhe vitin e kaluar KEK-u ka eliminuar të gjitha deponitë ilegale edhe këtë vit po vazhdojmë me të njëjtin ritëm. KEK-u në vazhdimësi përkrah komunitetin por edhe aksionin ‘Ta pastrojmë Kosovën’. Sot jemi këtu dhe do të shkojmë në të gjitha fshatrat ku KEK-u operon”, ka thënë Bucolli.

KEK-u viteve të fundit në Kastriot ka investuar me miliona euro në projekte që kanë për qëllim përmirësimin e ambientit si dhe në projektet e komunitetit të cilat ndikojnë drejtpërdrejtë në përmirësimin e cilësisë së jetës se qytetarëve.

“Në këtë vazhdë, në projektet për përmirësimin e ambientit, KEK-u në vitet e fundit ka investuar rreth 60 milion euro, të gjitha mjetet vetanake, është bërë transporti hidraulik hirit, janë ndërruar elektro-filtrat e “Kosovës A” jemi në proces e sipër me rishikimet mundësive edhe për ndërrimin e elektro-filtrave në “Kosovën B” Përveç kësaj, KEK-u ka prioritet edhe komunitetin, veç vitin e kaluar kemi investuar rreth 500 mijë euro, janë asfaltuar tri rrugë në fshatin Hade, kemi bërë ndriçimin e dy rrugëve dhe një është në proces e sipër, si dhe është bërë parku i qytetit, dhe tanimë veç sa kem aprovuar dhe jem në tenderim edhe të tri projekteve tjera për dy fusha sportive dhe një park tjetër në qytet”, është shprehur Bucolli.

Duke e vlerësuar bashkëpunimin që kanë me Korporatën Energjetike të Kosovës, në pushtetin komunal të Kastriotit thonë se janë duke punuar për krijimin e hapësirave të gjelbërta.

Për këtë aksion ka folur edhe drejtoresha e Ambientit në Komunën e Kastriotit, Fitore Hashani. “Këto aksione që kanë filluar po flas tani për vitet e fundit fokus në komunën e Kastriotit është ambienti. Meqenëse njihemi si komuna më e ndotur, përveç rehabilitimit të deponive dhe mbetjeve inerte që ndodhin në territorin tonë në fokus e kemi gjelbërimin në komplet territorin e Komunës, prandaj dhe jemi duke punuar si në mbjelljen e drunjve ashtu edhe me realizimin e parqeve në hapësirat ku janë të mundshme të realizohen”, ka thënë Hashani

Sipas punonjësve të KEK-ut largimi I këtyre deponive nuk është aspak i lehtë, por që kanë vullnet të plotë për ta çuar deri në fund këtë aksion.

Isak Nika, menaxher për rikultivim në KEK ka pohuar se: “Sot jemi me katër damperë një skip dhe me ekip të punëtorëve, problemi më i madh është se mbeturinat të cilat janë hedhur në këto deponi janë qysh moti prej pas luftës edhe para lufte”, ka theksuar Nika

Aksioni i KEK-ut për largim të mbeturinave i filluar qe tri ditë do të vazhdojë edhe ditëve të ardhshme.