Kënga ilirishte
Ragip Gjoshi
(Udhëheqësve të UÇK-së dhe të gjithë luftëtarëve të lirisë)
1.
O këngë ilirishte, o këngë e gërxheve të vendit tim!
Këngë e lirë e fjalë e lirë ilirishte
Ishim këtu para zogjve, para këngës së gurrave
Rënkimet e zemrës ilirisht rrëfeheshin
Ishim si loti para lotit të përvëluar
Para dhimbjeve ishim
Ishim vetëm plisbardhë
Ishim përtej gërxheve e përtej lumenjve
Ishim të ngarkuar me forcën e kujtimeve
Ishim këtu edhe para dreqit ne plisbardhët
Para të mallkuarve të paidentitet e të pamëshirë
Ishim të lumtur atëherë, thonë kronistët
Ishim në breg të detit të lirë…
Kudo kishte veç bardhësi e pellazgji
Ballë për ballë tallazeve dhe përballë rrufeve të moteve
Deri te Epoka e Re – Epoka e Ademit të përjetshëm.
2.
Në kronikën ilirishte erdhën tinëzarët
Rrufe lëshuan mbi listat e Ilirisë
Deri te degët e Kastriotëve
Deri në të shenjtën UÇK
Ne ishim këtu edhe para dreqit
Këtu ku këngë ilirishte shpërthyer kanë qëmoti mbi Iliri
Sërish tinëzarët plagë i hapën historisë dhe trimërisë,
Trimëritë i mbështollën në tym e zjarr e mjegull
Në dosje padrejtësisht u palosën gënjeshtrat
Që në katakombe peng të mbahen këngët ilirishte
Jemi në pritje të diellit në mesnatë të pranverës
Të atyre që mbajnë të ngarkuar barrë mbi kurriz
Kosovën si një varr në kraharor
Të atyre që në djep iu pikën dy pika loti për këngën ilirishte
Atyre që me këngë ninulla e barot i ushqyen nënat
Atyre këmbëzbathurve të Arbërisë së vogël,
Atyre që kapërcyen udhët me shumë kthesa të malit
Atyre djemve që kishin lexuar Abetaren ilirishte
Atyre që beson në ëndrrat ilirishte
Të atyre që u bënë roje të përjetshme në pritën hasmit.
3.
Jemi në pritje për një “devër” tjetër
Për shembjen e “zamanit” të shpifjeve
Që “zullumi” i një kohe të këputet së trashi
Ofshamat e nënave këpusin nyjat e litarit
I mallkoftë buka e tokës ilire, gurra e bjeshkëve tona!
I vraftë kënga ilirishte të gjithë shpifësit!
Drenicë, më 31 mars 2022