Drejtoria e Shërbimeve Publike në Skenderaj, bashkë me kompaninë “Uniteti”, pas eliminimit të 106 deponive ilegale muaj me parë, gjatë javës që e lamë pas ka larguar edhe dy deponi të tjera, njërën te “Lagjja 3” e qytetit dhe tjetrën në Burojë, te rruga “Mulla Ilaz Buroja”.

Me këtë rast, kryetari i Skenderajt, Bekim Jashari, ka apeluar te qytetarët që mbrojnë mjedisin. Jashari ka thënë se janë në rrugë të mbarë për të ndërtuar një qytet të zhvilluar dhe të pastër.

“Duke u kujdesur për natyrën ne kujdesemi për shëndetin tonë. Aplikimi i gjobave kundër atyre që ndotin mjedisin nuk është dëshirë e jona, por nganjëherë mjet i domosdoshëm i vetëdijesimit qytetar”, ka thënë Jashari.

Më tutje, Jashari ka kërkuar nga qytetarët e Skenderajt që të mos hedhin mbeturina jashtë vendeve të caktuara dhe lajmërojnë tek organet komunale të gjithë ata që ndotin mjedisin.