Historiani dhe artisti Genc Prelvukaj, ka kërkuar që ministrja Donika Gërvalla të lirohet nga detyra si kryediplomate,  pasi sipas tij ajo është e paaftë ta kryejë detyrën e saj.

Prelvukaj ka thënë se në kohën kur do të duhej një angazhim energjik, Kosova ka në krye të diplomacisë në njeri të paaftë.

“E para e diplomacisë së Kosovës, znj. Gërvalla Schwarz, duhet të lëvizë nga vendi menjëherë. Kemi njeriun më të paaftë në detyrë, në kohën kur do të duhej të vihej në veprim çdo energji dhe dije kundrejt çështjeve të pazgjidhura në rrafshin ndërkombëtar”, ka shkruar Prelvukaj në llogarinë e vet në “Facebook”.

Më tutje, ai ka thënë se Ministria e Punëve të Jashtme dhe Diasporës është në përgjumje të thellë, teksa ka përmendur deklaratën e më hershme të Gërvallës për mediumin zviceran.

“Vihet re një përgjumje e rëndë tek institucioni që drejton. Deri më tani dallohet vetëm për Intervista skandaloze siç ishte rasti në mediumin zviceran, deklarata të papranueshme mbi drejtuesit e luftës, për gabime të rënda në përmbajtje gjatë reagimeve në rrjete sociale, në të shprehur, përkthim, ngatërrime flamujsh e kështu me radhë”, ka shkruar Prelvukaj.

Si arsyeje për shkarkimin e Gërvallës ka përmendur edhe shkarkimin e ambasadorëve, duke e quajtur skandaloz një vendim të tillë.

”Pastaj shkarkoi një numër ambasadorësh në grup, pa bëjë një matje dhe analizë mbi punën e tyre. La bosh ambasadat në shumë vende me ndikim, që është skandal i llojit të rrallë. Për njohje dhe rezultate tjera as që bëhet fjalë. Duhet të lirohet nga detyra!”, ka shkruar Prelvukaj.