Banka Qendrore e Kosovës ka vendosur që pas pak ditësh t’i ndalë transaksionet e pagesave me dinarë.

Për këtë alarmoi presidenti i Serbisë, Aleksandar Vuçiq nga Davosi ku liderët e shteteve kanë shkuar për Forumin Ekonomik Botëror, por ka folur edhe emisari i BE-së për dialogun, Miroslav Lajçak, i cili tha se e ka njoftuar Brukselin për këtë dhe se shumë shpejt do të dalin me një qëndrim.

Por Këshilli Kombëtar Serb e ka cilësuar këtë çështje si lëshim për Kosovën nga ana e Serbisë për zbatimin e planit franko-gjerman për normalizimin e marrëdhënieve.

“Këshilli Kombëtar Serb i interpreton ato si një tjetër në një seri marrëveshjesh të paracaktuara. me Prishtinën, zbatimi i së cilës tani ka ardhur”, deklaruan nga ky Këshill.

Dyshimin e tillë, shtojnë ata, e mbështet edhe “rekomandimi” i të ashtuquajturës zyrë për Kosovën në qeverinë serbe, i cili, sipas tyre, u është dhënë në fund të vitit të kaluar punonjësve të strukturave ilegale të Serbisë në Kosovë, në radhë të parë atyre në arsim dhe shëndetësi, që t’i mbyllin llogaritë e tyrenë disa banka.

“Qëllimi i një vendimi të tillë të Beogradit në negociatat e mëtejshme me Prishtinën, i cili, siç pretendon presidenti Vuçiq, shpall heqjen e transaksioneve të pagesave me Serbinë qendrore dhe ndalimin e përdorimit të dinarëve, mund të jetë njoftimi për gjetjen e një zgjidhjeje për financimin e ardhshëm të punëtorëve në institucionet e Republikës së Serbisë në Republikën e Kosovës përmes të ashtuquajturës Ministrisë së Financave të Republikës së Kosovës”, thuhet në deklaratën e Këshillit Kombëtar Serb.

Ata e interpretojnë këtë si një tjetër koncesion për Kosovën dhe pretendojnë se Vuçiq ka pasur “marrëveshje të ngjashme të fshehta me Kurtin” më parë.