Ditë më parë Toni Kroos njoftoi largimin nga Real Madridi pas finales në Ligën e Kampionëve kundër Borussia Dortmund, më 1 qershor dhe tërheqjen nga futbolli aktiv pas përfundimit të “Euro 2024”.

Drejtuesit e “Los Blancos” kanë nisur menjëherë punën për gjetjen e zëvendësuesit të 34-vjeçarit. Tekniku Carlo Ancelotti ka pjesë të skuadrës shumë mesfushorë cilësorë dhe me të ardhme, por presidenti Florentino Perez është gati t’i bëjë një dhuratë të madhe.

Deri më tani dy janë emrat që pëlqehen për të mbushur boshllëkun që do të krijojë Kroos, me presidentin e “Galaktikëve”, që kërkon në Madrid me njërin prej Joshua Kimmich, të Bayern Munich apo Rodri të Manchester City.

Sigurisht që blerja e ndonjërit prej tyre nuk do të jetë mision i lehtë, por çdokush e ka të vështirë të refuzojë kur 14 herë fituesit e Ligës së Kampionëve të trokasin në derë, diçka që e pranon edhe Kimmich, i cili është nën kontratë me “Bavarezët” deri në vitin 2025. “Për momentin nuk mendoj për të ardhmen. Në fillim do të ulem të bisedoj me drejtuesit e Bayernit. Ama, Barcelona dhe Real Madrid klube madhështore me histori të jashtëzakonshme”, u shpreh “shkatërruesi” gjerman i mesfushës.