Skuadra e Rahovecit në hendboll nesër (e shtunë) në orën 19:00 e pret ekipin rumun CS Minaur Baia Mare në ndeshjen e parë në EHF European Cup. Kjo skuadër po synon ta shkruajë historinë në sportin e Kosovës duke u bërë skuadra e parë që kualifikohet në mesin e 16 skuadrave më të mira.

“Ky është një mision jashtëzakonisht i vështirë, pasi kemi të bëjmë me një ekip me përvojë të jashtëzakonshme në këto nivele. Madje mund të themi se ekipi rumun është një nga favoritët e kësaj gare. Duam të dëshmojmë se jemi të gatshëm për ndeshje të këtyre niveleve dhe do të japim gjithçka nga vetja. Por, do të jetë definitivisht e pamundur pa përkrahjen tuaj masive në Rahovec”, thuhet në postimin e KH Rahoveci.

CS Minaur Baia Mare është tri  herë kampion në Rumani, 6 herë fitues i kupës, 2 herë fitues i EHF Cup, gjysmëfinalist i edicionit të fundit të EHF European Cup dhe finalist në vitin 2022. Ka pjesëmarrje edhe në Ligën e Kampionëve. Përkundër disa vështirësive financiare me të cilat përballet, ka ekip kompakt me lojtarë shumë të fortë.