Pekini ka akuzuar Shtetet e Bashkuara të martën për “fyerje” rreth rrjetit social kinez, “TikTok”, pas shtimit të presionit nga ana e presidentit amerikan, Donald Trump për blerje të kësaj platforme nga një kompani amerikane për territorin e SHBA-së.

“TikTok” është duke u hetuar nga autoritetet amerikane për çështje të lidhura me sigurinë kombëtare, për shkak të shqetësimeve se mbledh informacionet e përdoruesve dhe ka mundësi t’i ndajë ato me qeverinë kineze në rast se urdhërohet.

Më 3 gusht, presidenti amerikan, Donald Trump i ka dhënë “TikTok”-ut afat gjashtë javë për t’i shitur operacionet e tij në SHBA, duke thënë se nuk kundërshton blerjen e këtyre shërbimeve nga ana e gjigantit amerikan, Microsoft.

“Kjo është kundër parimeve të tregjeve të ekonomisë dhe parimeve të Organizatës Botërore të Tregtisë për liri, transparencë dhe mosdiskriminim”, ka thënë zëdhënësi i Ministrisë së Jashtme kineze, Wang Wenbin.

“Shtetet e Bashkuara, pa ofruar të dhëna, kanë akuzuar me konceptin e sigurisë kombëtare, duke iu bërë presion të paarsyeshëm disa kompanive joamerikane”, ka thënë ai.

Wang ka thënë se pretendimet amerikane për çështje të sigurisë së aplikacioneve kineze “nuk kanë bazë”, duke shtuar se kompanitë kineze kryejnë aktivitete biznesore në përputhje me ligjin ndërkombëtar dhe ligjet e SHBA-së.

Trump, i cili ka kërcënuar javën e kaluar me ndalim të “TikTok”-ut në SHBA, për shkak të shqetësimeve për mbledhje të informacioneve nga shërbimet e inteligjencës kineze, ka thënë se ka folur me shefin e “Microsoft”-it, Satya Nadella rreth blerjes së mundshme.

Trump ka thënë se nëse Microsoft apo ndonjë kompani tjetër amerikane nuk e blen këtë rrjet social, “TikTok” “do të jetë jashtë biznesit në SHBA”.

“Microsoft” në anën tjetër ka thënë se është “i përkushtuar në kërkesën ndaj “TikTok”-ut për të rishikuar sigurinë dhe të ofrojë përfitime ekonomike për Shtetet e Bashkuara”.

Mediat shtetërore kineze ka thënë më 4 gusht se Pekini nuk do të pranojë, atë që e ka cilësuar “vjedhje” të “TikTok”-ut në SHBA, duke thënë se Pekini ka mënyra për t’iu hakmarrë presionit të Uashingtonit./rel/