Kina ka raportuar një rënie të rasteve me koronavirusin e ri, por numri i vdekjeve të të infektuarve vazhdoi të rritet, përfshirë ato të dy pasagjerëve të moshuar në një anije lundrimi në karantinë.

Komisioni Kombëtar i Shëndetit në Kinë në 20 shkurt ka raportuar 628 raste të reja në provincën qendrore Hubei, që konsiderohet epiqendra e virusit, dhe 45 raste në rajone tjera.

Shifrat kanë treguar për numër më të ulët të rasteve të reja, për gati një muaj, përfshirë në provincën Hubei.

Ndërkohë, Kina ka thënë se numri i përgjithshëm i vdekjeve ka arritur në 2 118.

Më shumë se 74 000 njerëz janë infektuar në Kinë, dhe qindra të tjerë në gati 30 vende.

Irani ka raportuar dy vdekje, që shënuan vdekjet e para në Lindjen e Mesme.

Në Japoni, dy njerëz që kishin qenë në bordin e anijes së vendosur në karantinë – një burrë dhe një grua, kanë vdekur.

Dy shtetas të tjerë rusë në anije janë diagnostikuar me koronavirus, duke sjellë në tre numrin e përgjithshëm të rusëve që kanë janë infektuar, tha ambasada e Rusisë në Japoni më 20 shkurt.

Autoritetet kineze kanë izoluar qytete me më shumë se 60 milionë njerëz, si dhe kanë ndaluar transportin.

Vende të tjera kanë vendosur kushte të rrepta të hyrjes për shtetasit kinezë dhe personat që kanë vizituar kohët e fundit Kinën, lëvizje kjo që e ka zemëruar Pekinin.