Për herë të parë, Kina ka kaluar Japoninë në eksportet e makinave.

Këtë e ka konfirmuar edhe Shoqata e Prodhuesve Kinez, sipas së cilës, vitin e kaluar pothuajse 5.3 milionë automjete u larguan nga vendi. Dhe se mbi 3.8 milionë prej tyre ishin makina pasagjerësh.

Referuar statistikave zyrtare, Japonia eksportoi pak më shumë se 4 milionë makina pasagjerësh në 11 muajt e parë të vitit 2023. Ndaj nuk ka gjasa që hendeku prej më shumë se një milion automjetesh mes dy shteteve aziatike të jetë mbyllur në më pak se një muaj.

Sakaq, parakalimi i Japonisë kurorëzon planin afatgjatë të presidentit kinez Xi Jinping për ta bërë Kinën një superfuqi të automobilave. Një objektiv i arritur falë stimujve miliarda dollarësh për zinxhirin lokal të furnizimit, politikave proteksioniste në tregun e brendshëm dhe mospërputhjes me sanksionet perëndimore ndaj Rusisë.

Pas luftës në Ukrainë, prodhuesit evropianë dhe amerikanë ndaluan dërgesat dhe prodhimin e makinave në Rusi. Kompanitë kineze si BYD dhe Chery shpejtuan të mbushnin boshllëkun e lënë nga rivalët e tyre perëndimorë, duke pesëfishuar shitjet e tyre në Rusi.

Ndërkohë, vendimi i disa markave perëndimore për të hapur fabrika në Kinë kontribuoi gjithashtu në rritjen e eksporteve të Pekinit.

Vitin e kaluar, Tesla shiti mbi 344 mijë makina të prodhuara në gjigafabrikën e saj në Shangai.

Po ashtu gjigantë të tjerë të automobilave si BMW, Mercedes dhe Volkswagen kanë fabrika të mëdha prodhimi në Kinë që prodhojnë si për tregun vendas ashtu edhe për tregjet ndërkombëtare.

Primati i arritur nga Kina në vitin 2023 është ende kryesisht për shkak të eksporteve të makinave tradicionale, me benzinë ??dhe naftë. Megjithatë, për ta ruajtur dhe konsoliduar atë, Pekini po fokusohet në lëvizshmërinë elektrike, një sektor në të cilin kompanitë kineze kanë ndërtuar një avantazh konkurrues falë kontrollit të të gjithë zinxhirit të furnizimit.

Nuk është rastësi që në tremujorin e fundit të vitit të kaluar BYD kaloi Tesla-n për sa i përket regjistrimeve, duke konfirmuar zhvendosjen në tërheqjen e industrisë së automobilave nga Perëndimi në Lindje.