Kryetari i Demokracisë Konservatore, Abdullah Klinaku, ka thënë se Kosovës i nevojiten politika që nisin rritjen e lindshmërisë.

Klinaku, i cili është kandidat për deputet me numrin 30 si pjesë e koalicionit të kryesuar nga AAK-ja, ka thënë se ky koalicion ka plan konkret për  mbrojtjen e familjes.

“Kosova ka humbur rreth 200 mijë banorë gjatë 10 viteve të fundit. Për më tepër, indeksi i plakjes së popullsisë është rritur, duke treguar se si shoqëri po plakemi. Kosovës i nevojiten politika që nxisin rritjen e lindshmërisë. Prandaj, në kuadër të shtyllës së dytë për mbrojtjen e familjes, kemi propozuar: Shtesa për fëmijët deri në moshën 6-vjeçare në vlerë mujore prej 120 euro. Shtesa për fëmijët deri në moshën 16-vjeçare në vlerë mujore prej 150 euro. Mbështetje financiare për gratë e papuna që kanë 3 ose më shumë fëmijë, në vlerën e pagës minimale, për një periudhë deri në 10 vjet. Subvencione për lindje, konkretisht 1500 euro për lindjen e parë, 2500 euro për të dytën dhe 3 500 euro për të tretën. Ty të mbetet që të na besosh votën, ndërsa neve na mbetet obligim të përmbushim zotimet tona!”, ka shkruar Klinaku në “Facebook”.