Këshilli për Mbrojtjen e të Drejtave dhe Lirive të Njeriut (KMDLNj) ka reaguar pas raportimeve të ish-kryetarit të gjyqtarëve të EULEX-it, Malmolm Simmons, për pretendimet e tij rreth skandaleve në misionin ku ai kishte punuar për disa vite.

Në reagimin e KMDLNj-së është kërkuar të mos heshtin institucionet e Kosovës karshi deklaratave të Simmonsit.

KMDLNj ka thënë se Simmonsit duhet t’i jepet e drejta të dëshmojë para Komisionit parlamentar për legjislacion në Kuvendin e Kosovës.

Reagimi i plotë i KMDLNj-së:

Se misionet ndërkombëtare në botë si dhe në Kosovë nuk janë sjellë në përputhje me natyrën dhe detyrimet që i kanë pasur të qartësuara në dokumentet e tyre, është një e vërtetë e ditur mirëpo gjithmonë e mohuar nga drejtuesit e këtyre misioneve. Informatat vendore janë pranuar me rezervë kurse informatat nga anëtarë apo përfaqësues të këtyre misioneve që kanë denoncuar shkelje të shumta, kanë pasur besueshmëri të kontestuar për faktin se ato janë bërë publike vetëm pasi e kanë përfunduar misionin apo nuk iu ishte vazhduar kontrata e punës.

Janë të fshehta publike aferat që i kanë bërë anëtarë apo përfaqësues të këtyre misioneve duke keqtrajtuar punëtorë vendas dhe duke ua kushtëzuar vazhdimin e kontratave me favore seksuale, të të dy gjinive, duke vjedhur miliona dhe miliona euro si rasti Trashler, duke e favorizuar korrupsionin pasiv dhe aktiv sikur Kushner që ia dha monopolin për telefoninë mobile Telekomit të Monakos (Francë) dhe duke eliminuar konkurrentë tjerë, duke ndërhyrë në zgjedhje të presidentëve (Pacolli dhe Jahjaga), duke privatizuar asete të vlefshme me shuma qesharake, duke arrestuar dhe kurdisur procese politike kundër personaliteteve të rëndësishme të UÇK-së, duke bërë përpjekje të blejnë dëshmitarë të rrejshëm me para dhe privilegje tjera, duke bashkëpunuar me autoritetet serbe në dëm të Kosovës dhe dobi të Serbisë, sidomos në planin e luftimit apo mos-luftimit të krimeve të luftës dhe duke e shitur pafajësinë e pamerituar apo duke e dënuar dikë me porosi apo për shkaqe politike.

Në Kosovë ishin disa përpjekje të sqaroheshin dhe të viheshin para përgjegjësisë prokurorë dhe gjykatës të misioneve ndërkombëtare por që, për shkak të imunitetit, asnjëri nga ata nuk u dënua. Apo u dënuan 2-3 raste për krime ordinere .

Prokurorja e EULEX-it, Maria Bamieh bëri publike disa keqpërdorime brenda misionit mirëpo u eliminua si e pabesueshme shkaku se këtë e bëri pasi e larguan nga puna.

Malcom Simmons, ish-kryetar i Kuvendit të Gjykatës së EULEX-it, gjithashtu, pasi e larguan nga misioni reagoi duke bërë publike shumë shkelje të këtij misioni duke shfaqur vullnet dhe gatishmëri të dëshmojë para Komisionit Parlamentar për Legjislacion të Kuvendit të Kosovës gjë që fillimisht u pranua mirëpo, shkaku se Kuvendi i Kosovës u shpërnda, iku edhe propozimi i

Malcolm Simmonsit për të dëshmuar para një Komisioni Hetimor të Kuvendit të Kosovës i cili do të formohej pas dëshmisë së zotit Malcolm Simmons.

Pasi kjo çështje nuk mori epilogun e dëshiruar nga zoti Malcolm Simmons , i njëjti intensifikoi paraqitjet publike në media dhe rrjete sociale në të cilat denoncoi keqpërdorimet e shumta që i kishte bërë në Kosovë misioni i EULEX-it dhe për të cilat zoti Simmons deklaron se ka materiale të bollshme me të cilën do ta dëshmonte akuzën eksplicite që ia bënë këtij misioni.

Me ndërrimin e pushtetit dhe përbërjen e re të Kuvendit të Kosovës, insistimi i Malcolm Simmonsit për të dëshmuar vetëm sa u shtua në ndërkohë që reagimi institucional nuk dukej e as që duket në horizont. Malcom Simnons, si pjesë e një organizimi të BE-së në Kosovë e që quhet Mision për Sundim të Ligjit – EULEX, madje thuaja në krye të piramidës udhëheqëse, nuk është person pa informata, që nuk e ka të qartë peshën e provës apo faktit por edhe peshën e përgjegjësisë nëse nuk e flet të vërtetën duket sa ka shumë për t’i thënë Komisionit Parlamentar për Legjislacion e, përmes tyre edhe qytetarëve të Kosovës, e vërtetë për të cilën EULEX-i po heshtë sikur edhe institucionet tona. Pse po heshtë EULEX-i është plotësisht e kuptueshme, pse po heshtin institucionet e Kosovës nuk ka ndonjë logjikë sidomos pas pohimeve të Malcolm Simmonsit se këto misione ndërkombëtare në Kosovë i kanë dorëzuar Serbisë dosje për krime lufte që kanë për pasojë edhe arrestimin nga Dhomat e Prokurorit të Specializuar të ish  kreut të UÇK-së dhe ish-kreut politikë të Kosovës e që mbahen të arrestuar në Burgun e Hagës.

KMDLNj-së e ka krejtësisht të qartë se misionet ndërkombëtare gëzojnë imunitet nga ndjekja penale prandaj edhe sillen në mënyrë shpërfillëse ndaj ligjeve të vendit dhe qytetarëve të Kosovës. Këto misione nuk i japin asnjë llogari udhëheqësve të Kosovës, madje, për ma keq, kur të duan mund të arrestojnë edhe udhëheqësit më të lartë të vendit siç ishte rasti i arrestimit të presidentit Hashim Thaçi, kryetarëve të Kuvendit të Kosovës, Jakup Krasniqi dhe Kadri Veseli, shefit të grupit parlamentar të LV-së, Rexhep Selimi, drejtuesve të OVLUÇK-së, Hysni Gucati dhe Nasim Haradinaj, eprorëve të UÇK-së, Salih Mustaf dhe Pjetër Shala dhe cilindo që duan.

Të prisni që këta të hetohen nga një Komision parlamentar i Kosovës apo prokurori e Kosovës, është skajshmërisht e pamundur dhe joserioze. Mirëpo, në anën tjetër kjo nuk do të duhej të paraqiste pengesë që zoti Simmons të deklarohet para Komisionit parlamentar për legjislacion të Kuvendit të Kosovës për faktet që i ka për misionin e EULEX-it, të cilin sipas zotit Simons dhe ndërkombëtarë të tjerë këtë mision (EULEX ), më së paku mund ta paraqesim si Mision për Sundim të Ligjit dhe realisht mund ta vendosim në kornizat e një ndërmarrjeje kriminale. Përpjekjet që zotit Simmons t’i pamundësohet dëshmia para institucioneve të Kosovës duket se është përpjekje për ta fshehur të vërtetën ndaj qytetarëve të Kosovës të cilët kanë të drejtë të informohen për atë që po ndodhë në Kosovë dhe ku nuk kanë qasje sikur që janë misionet ndërkombëtare në ndërkohë që e drejta për informim është e drejtë elementare e njeriut.

KMDLNj-ja është e sigurt se kjo dëshmi para Komisionit për Legjislacion e kërkuar nga zoti Simmons nuk prodhon asnjë efekt apo pasojë juridike përveç se do ta bënte publik angazhimin e pandershëm dhe të kriminalizuar të disa hetuesve , prokurorëve dhe gjykatësve të UNMIK-ut dhe EULEX-it dhe të cilët, po këtë aktivitet mund ta vazhdojnë në Zyrën dhe Dhomat e Specializuara në Hagë për faktin se janë rekrutuar pas shërbimit në Kosovë.

KMDLNj-ja nuk paragjykon nëse zoti Simons ka të drejtë në akuzat eksplicite që ia bënë EULEX-it mirëpo mbron të drejtën e njeriut për informim objektiv për qytetarët e Kosovës. Nëse, edhe më tutje i mohohet gatishmëria e Malcom Simmons të dëshmojë para institucioneve të Kosovës, atëherë edhe e vërteta e këtyre pohimeve dhe akuzave nuk mund të mohohet, del se zoti Simmons ka të drejtë.