Zyrtarë të Policisë së Kosovës arrestuan sot 12 aktivistë që protestuan para zyrave të ZRrE-së kundër rritjes së çmimit të energjisë elektrike prej së paku 15 për qind e që është e papranueshme dhe e papërballueshme për pjesën më të madhe të qytetarëve të Kosovës.

Këshilli për Mbrojtjen e të Drejtave dhe Lirive të Njeriut ka kundërshtuar arrestimin e aktivistëve para ZRrE-së.

“KMDLNj e përkujton opinionin se kjo është rritja e tretë e çmimit të rrymës gjatë mandatit 4-vjeçar të qeverisë Kurti 2 që nënkupton se rritja e tretë e çmimit të rrymës e kompleton shifrën prej 146 për qind. KMDLNj e përkujton opinionin se ZRrE në afatin 15-vjeçar ka vjedhur qytetarët e Kosovës duke ua fryrë faturat për të kompensuar shpenzimin e rrymës nga ana e serbëve gjë që e ka konstatuar edhe gjykata kompetente duke marrë vendim që të kompensohen e që ZRrE nuk e ka bërë. ZRrE ka diskriminuar qytetarët e Kosovës ekskluzivisht në baza etnike që është në kundërshtim të plotë me ligjet në fuqi dhe Kushtetutës së Kosovës. Qeveritë nuk kanë ndërmarrë asnjë veprim për të mbrojtur qytetarët por janë rreshtuar pas një institucioni diskriminues dhe shkelësi i të drejtave të njeriut që është ZRrE. Propozimin e fundit për rritje të çmimit të rrymës e kanë kundërshtuar të gjitha institucionet, qytetarët, shoqëria civile, bizneset, odat ekonomike dhe mediat”, thuhet në reagimin e KMDLNj-së.

Sipas këtij reagimi, Qeveria e Kosovës ka dalë me një propozim mashtrues dhe diskriminues duke përkrahur rritjen e çmimit të energjisë elektrike për qytetarët që shpenzojnë mbi 800 Kw në muaj që rëndë e shkelë parimin kushtetues për trajtim të barabartë dhe jodiskriminues të qytetarëve e që është në kundërshtim të plotë me dokumentet kombëtare dhe ndërkombëtare për të drejtat e njeriut.

KMDLNj fton qytetarët e Kosovës që të dalin në numër sa më të madh në protestën e paralajmëruar me 5 prill 2025 për të kundërshtuar rritjen e çmimit të energjisë elektrike dhe për të kërkuar përgjegjësi për vjedhje 15-vjeçare që ua ka bërë ZRrE-ja si dhe për moskompensim të dëmit të bërë.

KMDLNj ka theksuar se përkrahë çdo protestë paqësore sikur që ishte protesta e sotme duke kërkuar që protesta të valëzohet në tërë Kosovën, në mbrojtje të standardit edhe ashtu të mjerë të shumicës së qytetarëve të Kosovës.

“KMDLNj fton Policinë e Kosovës që të mos instrumentalizohet nga politika dhe të mos pengojë protestat paqësore, si njërën ndër të drejtat elementare të njeriut. KMDLNj paralajmëron opinionin se rritja e çmimit të energjisë elektrike do të prodhojë efekte zinxhirore duke rritur çmimet e të gjithë artikujve tjerë dhe shërbimeve. Dilni sa më shumë në protesta, mos iu jepni ngjyrime politike dhe mos bini nën ndikime politike por protestoni ekskluzivisht kundër rrezikimit flagrant të standardit duke kërkuar në të njëjtën kohë indeksimin e çmimeve dhe rritjen e pagave , pensioneve, asistencës sociale si kusht për ta përballuar inflacionin. Kërkoni të hiqet taksa fikse prej 2 eurosh për çdo njehsorë në Kosovë dhe kërkoni përgjegjësi për këtë. KMDLNj kërkon lirimin e të arrestuarve dhe arrestimin e përgjegjësve konkret e që janë brenda ZRrE-së dhe Ministrisë përkatëse”, thuhet në reagimin e KMDLNj-së.