Këshilli për Mbrojtjen e të Drejtave dhe Lirive të Njeriut (KMDLNj) ka theksuar se pensionistëve po iu bëhet jonjerëzor dhe degradues.

“Pensionistët, pavarësisht nga mosha apo gjendja shëndetësore janë të detyruar që në çdo gjashtë muaj të paraqiten në pikat e caktuara për të dëshmuar se janë gjallë. Për një numër të pensionistëve kjo paraqitje paraqet problem të madh prandaj edhe e humbin pensionin shkaku i moslajmërimit. Para pikës së paraqitjes, sidomos në qendër të Prishtinës, kalimtari i rastit përballet me situata të rënda ku të moshuar në karroca, të shoqëruar apo edhe të vetmuar bëjnë përpjekje të futen brenda apo qëndrojnë në vetura”, është thënë në reagimin e KMDLNj-së, duke theksuar se skenat janë të llahtarshme dhe fyese për dinjitetin njerëzor dhe në kundërshtim të plotë me të drejtat e njeriut për këtë komunitet jashtëzakonisht të cenueshëm.

“KMDLNj edhe më herët ka reaguar kundër kësaj sjelljeje degraduese dhe diskriminuese ndaj pensionistëve duke kërkuar nga institucionet përgjegjëse të bëjnë zgjidhje më të përshtatshme por se asgjë nuk është punuar për këtë. Deputetët e Kuvendit të Kosovës është dashur ta trajtojnë seriozisht këtë çështje, sidomos pas reagimeve të Avokatit të Popullit dhe KMDLNj-së, pasi që është në mandatin e tyre dhe janë të detyruar të mbrojnë të drejtat e njeriut”, është thënë në këtë reagim.

Sipas KMDLNj-së, nëse institucionet përgjegjëse nuk kanë kapacitet të trajtojnë këto raste përmes vizitave verifikuese të rasteve që kanë vështirësi apo të pamundur të paraqiten në pikat e verifikimit, atëherë, përmes thirrjes publike duhet të angazhohet një kompani që do ta kryente këtë punë.

“Apo mund të ndihmohet edhe nga vullnetarët student ose nxënës të shkollave të mesme. Sido që të bëhet, institucionet përgjegjëse duhet ta shlyejnë këtë njollë turpi ndaj një gjenerate, dikur shumë kontribuese, tash në margjina të interesit institucional për një trajtim dinjitoz, në përputhje me ligjin dhe të drejtat e njeriut”, është theksuar ndër të tjera në reagimin e KMDLNj-së.