Avokati, Arianit Koci, njëherësh i autorizuar si përfaqësues i familjes së Faton Hajrizit për tërheqjen e trupit të pajetë të të ndjerit, ka bërë të ditur se tashmë është dhënë strishoja e nënës së Hajrizit.

Koci përmes një postimi në rrjetin social në Facebook ka shkruar se tanimë nuk ka asnjë arsye të mos lirohet trupi pas kryerjes së analizës së strishos.

“Strishoja e gojës e nënës së Faton Hajrizit është dhënë. Çdo gjë ka shkuar sipas planit tim. Zonja është me mua, rrugës për në Skenderaj. Tanimë nuk ka asnjë arsye të mos lirohet trupi, posa të kryhet analiza e strishos”, ka shkruar Koci.

Ndërkaq, avokati, Arianit Koci i cili është i autorizuar si përfaqësues i familjes së Faton Hajrizit për të tërhequr trupin e pajetë të të ndjerit, Faton Hajrizi kishte qëndruar disa ditë në Serbi për të bërë tërheqjen e trupit të Hajrizit.

Ndryshe, ditë më parë i arratisuri nga burgu i Smrekonicës në Kosovë, Faton Hajrizi, është raportuar të jetë vrarë nga autoritetet në Serbi.

Hajrizi ka qenë në kërkim nga autoritetet serbe, pasi më 18 korrik është raportuar se e ka vrarë një zyrtar policor serb dhe e ka plagosur një tjetër, gjatë një kontrolli rutinor në Lloznicë të Serbisë, qytezë në afërsi me Bosnje-Hercegovinën.