Karriera e Rey Manajt ka marrë një trajektore komplet tjetër nga ajo çfarë pritej. Tregoleshi në miqësoren kundër Gimnatic disa ditë më parë, dhe goli kundër Gironës ditën e djeshme, ka futur në mendime drejtuesit e Barcelonës për të ardhmen e sulmuesit të Kombëtares së Shqipërisë.

Katalanasit kishin menduar ta shisnin për të fituar një shumë të mirë parash, por paraqitja e mirë e Manajt ka bërë që drejtuesit të ndërrojnë mendje. Me Antonine Griezmann, Philippe Coutinho dhe Martin Braithwaite drejt largimit, në skuadër do të mbetej vetëm Sergio Aguero si sulmues qendrorë. E duke parë lëndimet e shpeshta që pësoi argjentinasi sezonin e kaluar, Barcelona nuk dëshiron që të mbetet pa një sulmues rezervë. Sipas mediave spanjolle, duke parë paraqitjen në rritje të Rey Manajt, trajneri Ronald Koeman i ka kërkuar presidentit Johan Laporta të mos e shesë sulmuesin shqiptar, por të mbahet si element i rëndësishëm në skuadër.

Madje mediat spanjolle, shkojnë dhe më tej duke e krahasuar Manajn me shokun e skuadrës Aguero, pasi pozicioni dhe lëvizshmëria në sulm është pothuajse identike. Lëndimi i djeshëm mund të favorizojë edhe më shumë 24-vjeçarin pasi asnjë skuadër nuk do të blinte një futbollist të lënduar, dhe Manaj mund të provonte sërish shanset e tij tek skuadra e parë e Barcelonës.