Shtatë pjesëtarë të Forcës së Sigurisë së Kosovës, të cilët do kthehen nga një trajnim në Turqi do të karantinoren në Qendrën e Studentëve.

Këtë e ka konfirmuar në një intervistë për “Ekonomia Online”,  komandanti i Forcës së Sigurisë së Kosovës, gjenerallejtënant Rrahman Rama.

Ai ka treguar se FSK -jai ka në gjendje gatishmërie shtatë ekipe mjekësore, disa autoambulanca dhe një numër të shtretërve nëse ka nevojë.

Rama në këtë intervistë ka folur për tërë angazhimin e FSK-së në menaxhimin e situatës së krijuar nga pandemia e koronavirusit, gatishmërinë e ushtrisë për ndihmë qytetarëve të vendit, pjesëtarin e infektuar dhe ata që janë në vetizolim.

Rama, ka bërë me dije se ekipet e specializuara të FSK-së  janë në gjendje gatishmërie varësisht ku paraqitet nevoja për tu angazhuar.

Ai ka thënë se hapi i parë që e kanë marrë ka qenë kujdesi për personelin e FSK-së,  që të jenë në gjendje të mirë shëndetësor që tu dalin në ndihmë qytetarëve dhe institucioneve të Republikës së Kosovës.