Komandanti i Forcës së Sigurisë të Kosovës (FSK), gjenerallejtënant Rrahman Rama ka qëndruar për vizitë zyrtare në Republikën e Maqedonisë së Veriut.

Komandanti i FSK-së, në Komandën e Ushtrisë të Republikës së Maqedonisë së Veriut u prit me ceremoni ushtarake.

Sipas një njoftimi të Ministrisë së Mbrojtjes, gjatë vizitës, komandanti i FSK-së, gjenerallejtënant Rrahman Rama, fillimisht u prit në takim nga ministrja e Mbrojtjes e Republikës së Maqedonisë së Veriut, Radmila Shekerinska e cila shoqërohej nga drejtori i Shtabit të Ushtrisë së Republikës së Maqedonisë së Veriut, gjeneralmajor Zoran Milevski.

Gjatë takimit të përbashkët të gjeneral Ramës dhe ministres Shekirinska u bisedua për marrëdhëniet e mira dhe bashkëpunimin e suksesshëm në mes dy ministrive.

Komandanti i FSK-së, në Komandën e Ushtrisë të Republikës së Maqedonisë së Veriut u pritë nga shefi i Shtabit të Ushtrisë së Republikës të Maqedonisë së Veriut, gjenerallejtënant Vasko Gjurqinovski. Pas pritjes protokollare të dy gjeneralët zhvilluan një takim pune kokë me kokë.

Po ashtu, komandanti i FSK-së, gjeneral Rama u prit në takim edhe nga presidenti i Republikës së Maqedonisë së Veriut, Stevo Pendarovski, i cili shoqërohej nga shefi i Shtabit të Ushtrisë së Republikës së Maqedonisë së Veriut, gjenerallejtënant Vasko Gjurqinovski, kurse komandanti i FSK-së, gjeneral Rama shoqërohej nga zëvendës ambasadori i Republikës së Kosovës në Maqedoni, Flurim Gashi, drejtori i ZMP-së, Ibrahim Shala, koloneli Hasan Hoxha, shef i Departamentit për Bashkëpunim Ndërkombëtar dhe Integrime Euroatlantike në Ministrinë e Mbrojtjes dhe major Jaser Mula, asistent ushtarak i komandantit.

Komandanti i FSK-së, gjeneral Rama, në fund vizitoi edhe Akademinë Ushtarake “Gjeneral Mihajlo Apostolski”, ku u takua me kadetë të FSK-së, të komuniteteve pakicë që studiojnë pa barriera gjuhësore në këtë akademi.

Nga zëvendës shefi Shtabit të Ushtrisë së Maqedonisë së Veriut, gjeneral majori Azin Nuredini u njoftua për kadetët e FSK-së, për nivelin e angazhimeve të tyre, si dhe për sukseset e treguara. “Vizita e komandantit të FSK-së, dëshmoi edhe një herë bashkëpunimin e mirë të deritashëm në mes të dy ushtrive”, është thënë në njoftimin e Ministrisë së Mbrojtjes.

/Epoka e re/