Koalicioni i OJQ-ve për Mbrojtjen  e Fëmijëve në Kosovë (KOMF) ka mbajtur ceremoninë e ndarjes së çmimeve vjetore për gazetarë në fushën e mbrojtjes së fëmijëve dhe Mirënjohjeve vjetore “Mik i fëmijëve” për kontribuuesit në fushën e mbrojtjes së fëmijëve në Kosovë.

Çmimet vjetore për gazetarë në fushën e mbrojtjes së fëmijëve u janë dhënë Dafina Halilit nga “Kosovo 2.0” Donjeta Murselajt nga “Klan Kosova” dhe Sarandaj Ramajt nga grupi “Koha”.

Ndërsa me mirënjohjen “Miku i fëmijëve” është nderuar Burim Piraj, pronar i kompanisë “Meka Hallall Food”, mbështetës i rregullt i “TeamRijad” dhe i cili ka ndërtuar në një shkollë në Dragash, pjerrina dhe tualete për fëmijët me nevoja të veçanta.

“Miku i fëmijëve” për këtë vit është vlerësuar edhe Luan Sallahi, afarist nga Zvicra bashkë me disa mërgimtarë kanë kontribuar në lehtësimin e transportit të disa fëmijëve në Prizren. Edhe Shpresa Xhaki, filantropiste dhe Atije Idrizaj nga poliklinika “Rezonanca” janë nderuar me mirënjohjen “Miku i fëmijëve”.