Gjykata e përgjithshme e Bashkimit Evropian (BE), ka njoftuar të mërkurën se Komisioni Evropian nuk i ka ofruar publikut qasje të mjaftueshme në marrëveshjet për blerjen e vaksinave kundër koronavirusit.

Komisioni Evropian, që është krahu ekzekutiv i BE-së, ka nënshkruar disa kontrata të mëdha me disa kompani farmaceutike në kulmin e pandemisë COVID-19, më 2020 dhe 2021.

Ligjvënësit e Parlamentit Evropian janë ankuar në gjykatën me seli në Luksemburg, se kanë kërkuar t’i shqyrtojnë kontratat, për t’i kuptuar termat dhe kushtet, por se u është dhënë vetëm qasje e pjesshme.

Për më tepër, sipas tyre, disa dokumente janë redaktuar dhe Komisioni ka thënë se kjo është bërë për të mbrojtur interesat tregtare dhe procesin e vendimmarrjes.

Gjykata e përgjithshme, ka theksuar se Komisioni Evropian nuk ka dhënë prova se si qasja në disa klauzola të marrëveshjeve, do të minonte interesin tregtar të kompanive të përfshira.

Po ashtu, gjykata ka theksuar se Komisioni Evropian ka mundur të japë më shumë informacione për deklaratat e anëtarëve të ekipit që ka negociuar kontratat.

“Komisioni nuk i ka marrë mjaftueshëm parasysh të gjitha rrethanat përkatëse, për t’i peshuar drejt interesat në fjalë”, ka theksuar gjykata.

Vendimi i saj vjen një ditë përpara se Parlamenti Evropian të votojë për rizgjedhjen e Ursula von der Leyenit në postin e presidentes së Komisionit Evropian. /REL/