Kryetari i komunës së Mitrovicë, Agim Bahtiri, ka pritur të mërkurën në një takim drejtorin e programit “Up to Youth”, Daniel Cruz, me të cilin kanë nënshkruar marrëveshjen e mirëkuptimit për realizimin e projektit “Up to Youth”, projekt ky i cili financohet nga USAID-i.

Projekti “Up To Youth”, është aktivitet pesëvjeçar i financuar nga Agjencia e Shteteve të Bashkuara për Zhvillim Ndërkombëtar (USAID) dhe ka për qëllim mobilizimin e rinisë për të qenë forcë e ndryshimeve pozitive, zhvillimin dhe demonstrimin e shkathtësive të buta/jetësore për rininë, si dhe mbështetjen e partnerëve të qëndrueshëm për kultivimin e një mjedisi, ku rinia mund të përfshihen në mënyrë pozitive të dobishme.

Gjithashtu programi i këtij projekti zhvillohet edhe në tre komponentë kryesorë; përforcimi i të rinjve që të bëhen forcë e ndryshimeve në komunitet, të rinjtë të pajisen me aftësi dhe shkathtësi të buta përmes trajnimeve, si dhe përforcimi i komunikimit në mes të institucioneve dhe të rinjve.

Kryetari Bahtiri duke i falënderuar për vizitën si dhe duke çmuar lartë bashkëpunimin që komuna e Mitrovicës ka pasur nder vite me USAID-in, e ka vlerësuar si shumë të rëndësishëm realizimin e këtij projekti në Mitrovicë sepse është mese e nevojshme përfshirja e të rinjve në aktivitet që zhvillohen brenda komunitetit ku jetojmë.

“Të rinjtë duhet të stimulohen si dhe të vetëdijesohen që të bëhen pjesë e aktiviteteve që ndodhin brenda komunitetit, sepse nuk mund të kemi një shoqëri të denjë dhe të shëndoshë pa përfshirjen e të rinjve në procese të ndryshme”, ka thënë Bahtiri.

Në fund të takimit, të dy palët u dakorduan që ky bashkëpunim të vazhdojë edhe në të ardhmen.

(Q.R / Epoka e re)