Komuna e Mitrovicës sot ka pranuar zyrtarisht dy kamionë njëri 18m3 ndërsa tjetri 8m3, donacion ky nga Banka Gjermane KFW dhe GIZ-i gjerman.

Ky donacion është dhuruar në ITP Prizren, ku në emër të Komunës së Mitrovicës morën pjesë drejtori i Drejtorisë për Mbrojtje të Mjedisit, Egzon Sadiku, së bashku me drejtorin e Drejtorisë së Prokurimit, Elvis Feka.

Ndërkaq pranimi i këtyre kamionëve është bërë nga Nënkryetari i komunës, Arian Tahiri dhe Kryeshefi Ekzekutiv i KRM “Uniteti”, Gazmend Morina.

Nënkryetari Tahiri ka falënderuar Bankën Gjermane dhe GIZ-in për këtë donacion shumë të rëndësishëm që është dedikuar për komunën tonë.

Drejtori Sadiku ka falënderuar të gjithë stafin e Drejtorisë së Mjedisit dhe të KRM “Uniteti”, duke thënë se ata janë një nga faktorët kryesorë të këtyre granteve të përfituara.

Këto pajisje të cilat i ka përfituar Komuna e Mitrovicës padyshim që janë një ndihmesë e madhe për përmirësimin e infrastrukturës dhe rrjedhimisht përmirësimin e cilësisë së grumbullimit të mbeturinave.