Inspektorati i Kryeqytetit të hënën që nga orët e hershme të mëngjesit në pika të ndryshme në Prishtinë ka zhvilluar kontrolle inspektuese mbi zbatimin e vendimit të kryetarit Përparim Rama, lidhur me orarin e përcaktuar të furnizimeve nga të gjithë transportuesit e mallrave – furnitorëve në kryeqytet.

Qarkullimi i të gjithë transportuesve të mallrave në kryeqytet, sipas vendimit të kryetarit Rama do të lejohet sipas këtij orari, në Zonën I, që përfshinë pjesën qendrore të kryeqytetit, nga ora 19:00 deri të nesërmen në orën 07:00 në mëngjes; në Zonën e II, që përfshin pjesën përtej qendrës së kryeqytetit, nga ora 18:00 deri të nesërmen në orën 07:00 në mëngjes. Ndërkaq bulevard/sheshi i kryeqytetit, nga ora 23:00 deri të nesërmen në orën 07:00 në mëngjes, për mjetet deri në 3.5 t.

Inspektorati i Kryeqytetit ka kërkuar nga të gjitha subjektet afariste që të respektohet ky orar, përndryshe do të jenë të detyruar që të ndërmarrim masa në përputhje me vendimin e kryetarit Rama por edhe kornizën ligjore në fuqi.

Në njoftimin e Drejtorisë së Inspeksionit, thuhet se kanë pranuar numër të madh të ankesave nga shumë qytetarë të Prishtinës mbi vështirësitë por edhe problemet e shumta që transportuesit e mallrave – furnitorët janë duke shkaktuar në zona të ndryshme në kryeqytet gjatë qarkullimit të tyre por edhe gjatë parkimit dhe zbrazjes së mallrave në destinacionet përkatëse.