Komuna e Prishtinës bashkë me Asociacionin e Arkitektëve të Kosovës kanë nënshkruar të hënën memorandum mirëkuptimi për bashkëpunim të ndërsjellë në përgatitjen e konkursit ndërkombëtar për konceptet ideore që ndërlidhen me projektin e Sallës Koncertale në qendër të Prishtinës.

Përmes këtij memorandumi, Asociacioni i Arkitektëve të Kosovës ka përgjegjësi që të ofrojë ekspertizë në fushë e arkitekturës për konkursin ndërkombëtar; do të ofrojë ekspertizë teknike në realizimin e projektit; të mbledhë materiale dhe të dhëna profesionale të nevojshme për aplikuesit; të përpilojë termat e referencës dhe detyrën projektuese për konkursin ndërkombëtar; të respektojë afatet kohore të parapara për përfundim të shërbimeve; si dhe të bashkëpunojë me Komunën gjatë gjithë implementimit të aktiviteteve.

Në anën tjetër, Komuna e Prishtinës do të ofrojë mbështetje institucionale me qëllim të arritjes së synimeve të kësaj marrëveshjeje, si dhe do të ofrojë mbështetje financiare për Asociacionin e Arkitektëve të Kosovës.