Ministri i Punëve të Brendshme, Agim Veliu ka pritur të martën në takim Matej Zakonjsek, sekretar i përhershëm i Komunitetit të Transportit, e cila është organizatë ndërkombëtare në fushën e mobilitetit dhe transportit, e përbërë nga 33 pjesëmarrës – e gjithë BE-ja dhe gjashtë partnerët rajonalë të Ballkanit Perëndimor, raporton “Epoka e re”.

Në këtë takim u diskutua për sigurinë e trafikut rrugor, e cila është një sfidë mjaft e madhe, me të cilën po ballafaqohen pothuajse të gjitha vendet e zhvilluara dhe ato në zhvillim, ashtu sikur edhe vendi ynë.

Ministri Veliu ka theksuar se MPB-ja me qëllim të ngritjes së sigurisë në trafikun rrugor, bashkë me Policinë e Kosovës, vazhdimisht ka trajtuar dhe proceduar problemet në infrastrukturë rrugore dhe ligjore dhe ka vazhduar bashkëpunimin me institucione vendore dhe ndërkombëtare.

Me këtë rast, Komuniteti i Transportit, ofroi mbështetje të plotë në realizimin e aktiviteteve dhe projekteve që kanë të bëjnë më rritjen e sigurisë në trafik dhe përmasimin e infrastrukturës rrugore.