Zyra e BE-së në Kosovë prezantoi të enjten raportin “Mbështetja e mëtejshme e institucioneve të Kosovës në luftën kundër krimit të organizuar, korrupsionit dhe ekstremizmit të dhunshëm”.

Me këtë rast u tha se konfiskimi i pasurisë së fituar në mënyrë të jashtëligjshme është çelësi për luftimin e krimit dhe korrupsionit.

Kryetari për sundim të ligjit në BE, Cezary Michalczuk, ka deklaruar se Kosova ka një legjislacion të mirë sa i përket konfiskimit të pasurisë së fituar në mënyrë të jashtëligjshme dhe sipas tij tash mbetet të shihen rezultatet konkrete. “Ne kemi diskutuar për konfiskimin, ka mbetur një kornizë shumë e mirë për luftimin e këtyre veprave. Ato që priten janë konkrete, rezultate konkrete, pra konfiskim”, ka thënë ai.

Kryeprokurori i Shtetit, Aleksandër Lumezi, ka thënë se Kosova nuk ka shënuar rezultate në konfiskimin e pasurisë, por që tha se çelësi i luftimit të korrupsionit është konfiskimi i pasurisë së fituar në mënyrë të paligjshme. “Është e vërtetë se deri më tani nuk kemi pasur rezultate të prekshme në konfiskim. Çelësi i suksesit në luftën kundër korrupsionit është konfiskimi i pasurisë së fituar në mënyrë të paligjshme”, u shpreh ai.

Kurse, udhëheqësi i projektit Ian Mcdonald, ka deklaruar se Kosova ka legjislacion të fuqishëm sa i përket konfiskimit. “Pasi dikush është dënuar për një krim të organizuar, pritet t’i shpjegojë gjykatës nga ka ardhur e gjithë pasuria e tij. Korniza ligjore që ka Kosova është më e fuqishme dhe më e lehta për t’u vënë në funksionim”, u shpreh ai./kp