Kongresi i Partisë Socialiste (PS) do të mbahet më 23 mars, në orën 10:00, në Pallatin e Kongreseve.

Burime nga Kryesia e PS-së, e cila u mblodh sot për të diskutuar mbi punimet e Kongresit, kanë bërë me dije për “Top Channel” se ky kongres do të jetë i ndarë në tri sesione të ndryshme.

Shembujt e qeverisjes lokale të PS-së, platforma e “Bashkëqeverisjes”, si dhe “Pakti për Universitetin” janë tri shtyllat e Kongresit.

Në të, fjalën kryesore do ta mbajë kryeministri Edi Rama, më pas do të ketë fjalime nga disa prej ministrave dhe disa kryebashkiakë, edhe pse nuk do të shpallen kandidatët socialistë për zgjedhjet lokale të qershorit të këtij viti.

Mësohet se ftesa për pjesëmarrje në kongres i është dërguar të gjithë kryetarëve socialistë ndër vite, përfshi edhe Fatos Nanon.

Në Kongres, fokusi i diskutimeve do të jetë te zgjedhjet lokale, teksa pritet të shpallet lista e këshilltarëve bashkiakë vetëm për kryeqytetin.