Kryetari i Kuvendit të Republikës së Kosovës, Glauk Konjufca, ka marrë pjesë në ceremoninë shtetërore të lamtumirës dhe ka bërë homazhe në nderim të jetës dhe veprës së shkrimtarit të shquar shqiptar, Ismail Kadare, që u mbajtën sot në Tiranë.

Konjufca ka thënë se dhimbja për ikjen e Ismail Kadaresë është shumë e madhe, por ka shtuar se ai do të jetë mes nesh i paharruar, me krijimtarinë e tij që do të mbetet e pavdekshme në letërsinë botërore.

Kreu i Kuvendit ka vlerësuar se me veprën e tij Kadare zgjeroi gjuhën, mprehu perceptimet dhe stërholloi ndijimet, ndezi imagjinatën e formësoi përfytyrime për të gjithë popullin tonë, përderisa figurat, frazat, vargjet dhe personazhet e tij janë tashmë referenca kolektive të mendimit dhe shqisave tona artistike si komb.

“Ismail Kadare i dha aq shumë kombit shqiptar, e për këtë të gjithë do të jemi gjithnjë mirënjohës, ndërsa përmes tij populli shqiptar i dha botës një gjeni të letërsisë, e për këtë do të jemi gjithnjë krenarë, ne dhe brezat që do të vijnë”, ka thënë Konjufca.