Kryetari i Kuvendit të Republikës së Kosovës, Glauk Konjufca, ka pritur të në takim ambasadorin e ri të Zvicrës në Kosovë, Jurg Sprecher, i cili shoqërohej nga zëvendësambasadori Christoph Fuchs.

Në takim, veç të tjerave është biseduar për marrëdhëniet e shkëlqyeshme dypalëshe dhe mundësitë e avancimit të mëtejmë të bashkëpunimit ndërmjet dy shteteve tona.

Kryetari Konjufca ka uruar ambasadorin Sprecher për detyrën dhe i ka dëshiruar mirëseardhje.

Konjufca i ka shprehur mirënjohje për kontributin e shquar dhe mbështetjen e gjithanshme të Zvicrës mike ndaj Kosovës në të gjitha proceset e shtetndërtimit, zhvillimit, integrimit dhe anëtarësimit në organizata ndërkombëtare si dhe ka nënvizuar rëndësinë që kjo mbështetje të vazhdojë edhe në të ardhmen.

Ndërsa ambasadori Sprecher e ka falënderuar kryetarin e Kuvendit për pritjen dhe po ashtu ka vlerësuar partneritetin dhe raportet e ngushta dypalëshe.
Kryetari Konjufca dhe ambasadori Sprecher kanë ritheksuar gatishmërinë për thellimin e mëtejshëm të marrëdhënieve në fusha të ndryshme bashkëpunimi në mes të Republikës së Kosovës dhe Zvicrës