Gjykata më e lartë e Koresë së Jugut ka shkarkuar Presidentin Yoon Suk Yeol, duke i dhënë fund muajve të pasigurisë dhe përplasjeve ligjore pasi ai shpalli shkurtimisht ligjin ushtarak në dhjetor, duke zhytur vendin në krizë politike.

Vendimi i gjykatës, i shpallur të premten, konfirmon zyrtarisht shkarkimin e Yoon nga posti i presidentit, pas votimit të parlamentit për shkarkimin e tij në dhjetor.

Ky vendim hyn në fuqi menjëherë, duke e detyruar Yoon të largohet nga rezidenca presidenciale dhe duke hapur rrugën për zgjedhje të reja.

Krizat e vazhdueshme politike kanë lënë një nga ekonomitë më të mëdha të botës dhe një aleat kyç të SHBA-ve pa drejtim në një moment të ndjeshëm për marrëdhëniet globale, veçanërisht në kohën kur politika “Amerika e Para” e Presidentit Donald Trump po ndryshon normat e politikës së jashtme dhe sistemin tregtar ndërkombëtar.

Të tetë gjyqtarët e Gjykatës Kushtetuese vendosën njëzëri për të mbështetur shkarkimin e Yoon, duke e cilësuar vendimin e tij për të shpallur ligjin ushtarak si një shkelje të rëndë të besimit të popullit, raporton CNN, transmeton Klankosova.tv.

Në natën kaotike të dhjetorit, ai kishte urdhëruar trupat të hynin në parlament dhe të “nxirrnin jashtë” ligjvënësit që u përpoqën ta ndalonin vendimin.

“Presidenti ka shkelur procesin formal për shpalljen e ligjit ushtarak, ka cënuar të drejtat e ligjvënësve dhe ka tradhtuar rëndë besimin e popullit”, deklaroi kryetari në detyrë i gjykatës, Moon Hyung-bae. Ai shtoi se dekreti i Yoon ishte jokushtetues, pasi nuk kishte ndonjë krizë të rëndë kombëtare që ta justifikonte një vendim të tillë.

Në një proces të ndarë penal, Yoon u arrestua në janar me akuza për organizimin e një kryengritjeje, por u lirua në mars pasi një gjykatë anuloi urdhrin e tij të arrestit, ndonëse akuzat ndaj tij nuk u hoqën.

Pas vendimit të së premtes, Yoon falënderoi mbështetësit e tij dhe tha se ishte një nder të shërbente si president, duke shtuar se “më vjen keq që nuk arrita të përmbush pritshmëritë tuaja”.